إقفلوا حديقة الحيوان في الجيزة بسرعة!!!

نداء إلى الدولة المصرية.. نداء لأي حد مسئول قلبه على سمعة مصر.. نداء لأي مصري عاقل..
إقفلوا حديقة الحيوان في الجيزة بسرعة!!! - او اقفلوها لسنة مثلاً عشان تعملوا اعادة ترميم وهيكلة. بس غير كدة يبقى تهريج رسمي!!!

لم يسعدني الحظ وقررت اروح حديقة الحيوان امس .. الجمعة الساعة ٢ بعد الظهر .. دخلت من البوابة المزدحمة.. اشتريت تذكرة الدخول ب٥ جنية.. عديت من البوابة القديمة جداً واللي مافيهاش اي وسائل تفتيش محترمة.. وبعدين دخلت في الزحمة للحديقة..
من لحظة دخولك بتقدر بسهولة تشم ريحة الفسيخ والمحشي.. وتمتع عينيك بشكل الزبالة وقشر اليوستفندي وقشر السوداني في كل حتة .. وياسلام على موسيقى المهرجنات اللي بتطرب بيها ودانك.
بتعدي كل ده وانت لسه عندك امل تشوف الحيوانات بقى.. المفاجأة بقى ان الاقفاص افضى حاجة في الحديقة.. جنينة كبيرة جداً للحمير الوحشي مافيهاش غير حمار واحد بس وعايز ينتحر من الوحدة.. الأسود من ٤ اماكن فيه اسدين بس ونايمين وعاملين دايت تقريباً.. فيه نسناس كان بيحاول يستخبى من اللي عمال يترمي عليه من برة.. عدد الحيوانات قليل جداً واغلبهم شكلهم مشطب صحياً .. والمحزن ان كل حرس وعمال الحديقة اللي قاعدين بجانب الحيوانات بيشربوا سجاير في وش الحيوانات عادي جداً.. والعيال الصغيرة اهاليهم سايبنهم يرموا (اي اكل) على كل الحيوانات.. ومافيش حد مانعهم..
من الحاجات اللطيفة برضه ان فيه ست قاعدة في الحديقة بتقرا الودع.. الاظرف انها بتقرأ الودع وهي بترضّع ابنها عادي كدة..
اي مكان فيه بحيرة هناك عبارة عن كم من المياه الملوثة والمزعجة للعين .. مافيش حد في الجنينة كلها بيمنع اي زائر انه يعمل حاجة.. اكل ماشي.. قالعين الجزم اوكيه.. تعمل بيبي لو مزنوق برضه مافيش اي مشكلة.. عايز تشغل اغاني مهرجانات او تبيع وترسم الوان على وش الاطفال كلها تلوث ونقل عدوى كله مسموح يا باشا..
ايه القرف ده؟؟ فعلاً.. ايه القرف اللي جوه المكان ده؟؟ دي جنينة الحزن للحيوان اللي حظه جابه مصر مش جنينة الحيوان!!
يعني ايه الحديقة الاكبر في الشرق الاوسط ومن الاعرق في افريقيا بمساحة ٨٠ فدان في وسط عاصمة مصر تبقى بالبشاعة دي؟!!!
اكيد فيه ناس مختصة ممكن تحل عن طريق نقل او اعادة هيكلة الحديقة بس ممكن اقتراحات مثلا زي:
تقفلوا الحديقة وتستغلوا المكان الضخم ده انه يجيب عائد مادي رهيب تبنوا بيه حديقة جديدة (فيها حيوانات مش اقفاص فاضية) بنظام امن ونظافة.. واعملوها في العاصمة الجديدة (كدة تمضنوا رجل على المكان.. واعملوا اتوبيسات عليها اعلانات وتنقل المواطنين ببلاش من والي العاصمة لغاية ما يفتحوا خطوط مترو هناك)
اقفلوا الحديقة سنة مثلاً اعملوا فيها اعادة هيكلة وانظمة امان واعادة تأهيل للحيوانات وجيبوا حيوانات جديدة من بره وجيبوا شركة مختصة تديرها وابقوا افتحوها تاني)
الحقيقة ان الشعب اللي بيروح مالوش ذنب.. هو مش بياخد في المناهج الدراسية اي احترام للحيوان اللي في القفص او الحيوان التاني اللي قرر يروح الحديقة برجليه.. فا الحل قانون حقيقي يحمي ويضمن نظام للمكان.. ويوفر فرصة للاجانب اللي يجوا المكان انهم يعرفوا يمشوا ويقفوا في طابور من غير ما يحصل فيهم تحرش.. ماينفعش نكون واخدين حيوانات من الغابة اللي ليها قوانين بتحكمها.. عشان نحطهم في حديقة ملهاش قوانين تنظمها..
حديقة الحيوان في مصر للأسف هو مكان هايل لو عايز تضر صحتك وبصرك واذنك ونفسيتك.. لو حد مسئول في البلد ومهتم بقيمة ال٨٠ فدان اللي طايرين في الهوا دول.. ياريت يتدخل او يبلغ حد يتدخل!
#حديقة_الحزن_للحيوان